Photo by James Lee on Unsplash
මේ දිනවල සිනමාහල්වල ජනප්‍රිය සිනමාපට දෙකක් ප්‍රදර්ශනය වේ. බාර්බී ලොව පුරා සැරිසරමින් ඩොලර් බිලියන 1.5ක ආදායමක් ඉපැයීමට ළංව ඇත. ඕපෙන්හයිමර් දෙවැනි ස්ථානය සඳහා තරඟ කරන අතර, අවසානයේ එයට ඩොලර් බිලියනයක් පවා පසුකර යා හැකිය. එකක් එක්තරා මනෝරාජික හැඟීමක් සහිත විනෝදකාමී සරල කතාවකි. අනෙක මානව වර්ගයා පිළිබඳ ඩිස්ටෝපියන් දැක්මක් සහිත අඳුරු සහ සංකීර්ණ තේමාවකින් යුතු පිටපතක් අනුගමනය කරයි. එබැවින්, ස්වාභාවිකවම, නරඹන්නන්ගේ රුචි අරුචිකම් ද එකිනෙකට සම්පුර්ණයෙන් වෙනස් විය යුතුය. මේ චිත්‍රපට දෙකේ රසිකයන් දෙපිරිස එකට එක් වී කිරිබත් කන්නේ යැයි සිතිය නොහැක.
‘හද සක් චාරිකා’ අඩවියේ පළමු බ්ලොග් පොස්ටුවේදීම අපි මේ ගැන කතා කරන්නේ ඇයි?
මේ දිනවල ජීවිතය අපට පිරිනමන තේරීම් පවා බාර්බී හෝ ඕපන්හයිමර් චිත්‍රපට වැනිය. ඒවා බෙහෙවින් අන්තවාදීය. අප කරන්නේ අපගේ කොනෙහි වාඩි වී, එතැනින් දකින දේ පමණක් දකිමින්, අපගේ දෘෂ්ටි කෝණයෙන් සිතන දේ ගැන පමණක් පිළිගනිමින්, මුහුණු පොතට ගොඩ වී, ගෝරනාඩු කිරීම පමණි.
රවුමක වාඩි වී, එකිනෙකාට මුහුණලා, එකිනෙකා ගේ හදවත් හැඳිනීමට උත්සාහ කරන්නේ ඉතා කලාතුරකිනි.
අපගේ ප්‍රියතම චිත්‍රපට දෙසට නැවත හැරෙමු.
බාර්බී සහ ඕපෙන්හයිමර් යන දෙකම අත්හදා බැලීමට විවෘතව සිටින සැලකිය යුතු පිරිසක් ද සිටිති. එම සංසිද්ධිය බාර්බෙන්හයිමර් ලෙස හැඳින්වේ. ඔවුන් පුර්ව විනිශ්චයකින් තොරව චිත්‍රපට දෙකම රස විඳීමට කැමැත්තෙන් සිටිති.
සමාජ මාධ්‍ය තුළ පලක් නැති දේවල් ගැන තර්ක කරමින් සිටිනවාට වඩා එවැනි යමකුත් උත්සාහ කළහොත් නරකද?
මිනිසුන් වශයෙන් එකිනෙකට සම්පුර්ණයෙන් පරස්පර සිතුවිලි පවා අප හිස තුළට එකම මොහොතක ගෙන ඒමට අපට හැකියාව ඇත. ක්වොන්ටම් යාන්ත්‍ර විද්‍යා පන්තියේ දී හයිසන්බර්ග් අවිනිශ්චිතතා මූලධර්මය තේරුම් ගැනීමට උත්සාහ කරන අතරතුරම, ඒ මොහොතේදීම, ඉදිරිපස පේළියේ වාඩි වී සිටින ගිනි කිකිළිය කෙරෙහි බැලුම් හෙළීමට ද අපට හැකි වූවා නොවේද? සමහර විට මෙය ගැලපෙනම නිදසුනක් නොවෙනවා විය හැකි නමුත් ඔබට කාරණය වැටහේ යයි සිතමි.
හද සක් චාරිකා වෙබ් අඩවියෙන් ද අප උත්සාහ කරනු ඇත්තේ එයම පමණි.
ජාතිය, ආගම, ස්ත්‍රී/පුරුෂභාවය, දේශපාලන හෝ සමාජ මතවාද සහ අපව වෙන් කරන වෙනත් අසංඛ්‍යාත කාරණා නොසලකා, ලොව පුරා සිටින කතුවරුන්, කලාකරුවන් සහ සමාජ ක්‍රියාකාරීන්—විශේෂයෙන්ම ශ්‍රී ලංකේය සහ ඇගේ ඩයස්පෝරික ප්‍රජාව—ඔවුන්ගේ කලාව, සාහිත්‍ය, සිතුවිලි සහ අදහස් (අප ඔබ හා එකඟ වූවත් නොවූවත්) බෙදා හදා ගන්නා අවකාශයක් නිර්මාණය කිරීම මෙම වෙබ් අඩවියේ පරමාර්ථයයි.
ඔබ ජීවිතය දෙස බලන්නේ කුමන කෝණයකින් වුව ද, හද සක් චාරිකාවට එක්වී, එක්ව ගමන් කරමු.